Табигатьнең сихри, гүзәл мәле

 

Табигатьнең сихри, гүзәл мәле –

Күбәләкләп ап-ак кар ява.

Ак юрганга күмеп бар җиремне –

Әйтерсең лә ак сафлык ява.

 

Ап-ак карлар минем күңелемә

Өстиләр ак шатлык, ак өмет.

Ак хыялларга уралып киләм-

Яшәргә иде һәрчак сөенеп.

 

Ак карлардай ак бәхет-шатлыклар

Юлдаш булып һәрбер кешегә.

Көнләшү дә хәтта актан булып-

Карасына шайтан үчегә…

 

Ак юлларда көтсен ак өметләр.

Ак юл сезгә, ак юл безгә дә.

Ап-ак юллар телим җиркәемә,

Ак юл җәйдә, ак юл көздә дә,

Ак юл җирем шаулы язда да!